काठमाडौं /सुदूरपश्चिम रोयल्स शनिबार जनकपुर बोल्ट्सलाई पराजित गर्दै सिद्धार्थ बैंक नेपाल प्रिमियर लिग (एनपीएल) को प्लेअफ सुरक्षित गर्ने पहिलो टिम बनेको छ। कीर्तिपुरस्थित टीयू क्रिकेट मैदानमा १४६ रनको लक्ष्य सुदूरपश्चिमले १७.४ ओभरमै ४ विकेट गुमाएर पार गर्दै पाँचौँ जित दर्ता गर्यो।
इशान पाण्डे टीमका लागि चम्किए। ३५ बलमा ५ चौका र १ छक्कासहित ५६ रन बनाएर उनले इनिङ्सलाई सुदृढ बनाए। सुरुवातमै एक रनमै दुई विकेट झर्दा दबाबमा परेको टोलीलाई उनले र विनोद भण्डारीले ९२ रनको महत्वपूर्ण साझेदारी गर्दै उकासे। विनोदले ४९ बलमा ४२ रन जोडे। अन्त्यतिर हर्मित सिंहले १० बलमा अविजित २५ रन थपे।
जनकपुरका माज सदाकतले २ विकेट लिए। चार खेलमा लगातार हार बेहोरेको जनकपुर अब लिगबाटै बाहिरिने संकटमा छ। बाँकी तीनै खेल जित्नुका साथै प्रतिद्वन्द्वी टोलीका नतिजा पनि अनुकूल रहनुपर्ने परिस्थिति छ।
यसअघि टस जितेर पहिले ब्याटिङ गरेको जनकपुरले ८ विकेटको क्षतिमा १४५ रन बनायो। सञ्जय कृष्णमूर्तिले उत्कृष्ट ५० रन गरे भने लफ्टी इटनले ३९ रन थपे। सुदूरपश्चिमका अविनाश बोहराले ४, स्कट कुगेलेइनले ३ र कप्तान दीपेन्द्रसिंह ऐरीले एक विकेट लिए।
